2009 புத்தாண்டு.. சுஜாதா இருந்திருந்தால் என்ன எழுதி இருப்பார்??

புத்தாண்டு வாழ்த்துகள்..(க் இல்லையாம்ப்பா)

இன்னும் ஒரு வருஷம் கடந்து விட்டது என்பதை விட நொண்டி நொண்டி தாண்டிவிட்டோம் என்றே தோன்றுகிறது.. பொருளாதார நெருக்கடி உலகத்தை ஆண்டியாக்கியது இந்த ஆண்டின் முக்கிய நிகழ்வு.. மேலே பறந்து பறந்து பிஸினஸ் டெவலப் செய்கிறேன் என்ற பீட்ஸா, கோக் கோஷ்டிகளை சுவரில் சாய்த்து தங்கள் முழங்காலை அவர்களின் நெஞ்சில் வைத்து செலவைக் குறைக்கச் சொல்லிவிட்டது‍ - வெள்ளைக்கார "வள்"

முடியும் என்று நமது உதயமூர்த்தி சொன்னதை உட்டாலக்கடி செய்து ஒபாமா உலகின் கவனத்தை கவர்ந்த வைபவமும் இந்த ஆண்டில் நடந்தேறியது. எங்கு திரும்பினாலும் அவர்தான். சரவணபவன் சர்வர் அடையை வைத்துவிட்டு "ஒபாமா வந்துட்டாரே இனி எல்லாம் சரியாகிவிடுமா சார்" என்று கேட்டார் என்றால் பார்த்துக்கொள்ளுங்கள்.. புஷ்க்கு இவர் தேவலாம்தான்..கடவுள் சிரிக்கிறார் கதைதான் நினைவிற்கு வருகிறது.. கதை தெரியாதவர்கள் ஒரு போஸ்ட் கார்டில் உங்கள் விலாசம் எழுதி உங்களுக்கே போஸ்ட் செய்து தெரிந்து கொள்ளுங்கள்..

சில தமிழ்படங்கள் ஆச்சர்யத்தையும் பல படங்கள் ஆயாசத்தையும் வழக்கம் போல் ஏற்படுத்தின.குறிப்பிட்டு சொல்லும்படியான படங்களில் என்னைக் கவர்ந்தது அஞ்சாதேயும் சு புரமும். வாரணம் ஆயிரம் விளக்கெண்ணெய் வளவள.

அதே அரசியல்.. ஷீலா தீட்சித் ஆச்சர்யம்.

மிகவும் பாதித்தது என்று யோசித்துப் பார்க்கையில் என்று எழுதக்கூட வேலை வைக்காமல் தோசை சுட்டது போல் தீவிரவாதிகள் சுட்ட சம்பவம்.. ஃபைவ் ஸ்டார் ஹோட்டல் தோசை.. இந்த சம்பவத்திற்கு பிறகு சென்னை முடுக்குச் சந்து ஏழாவது மாடி பால்கனியில் நிற்கக் கூட பயமாக இருப்பதால் பம்மிப் போய் ஹாலில் அமந்து விடுகிறேன்.. நல்ல திடமான ஒரு பெண் டி வில் "ஹாய் மச்சான்ஸ்" என்று கூறுவதைப் பார்த்து பயந்து போன எனக்கு குடிக்க நீர் கொடுத்த நிஜ சுஜாதாவின் கைங்கர்யத்தால் அந்த மாதுவின் பெயர் தெரிந்து கொண்டேன்.. நமிதாவாம்.. நல்ல வளம்..குரலில்.

அந்த சட்டக்கல்லூரி மாணவர்களைப் பற்றி மேல்தகவல்கள் ஏதும் கிடைக்காததால், எதிர்காலத்தில் நல்ல உடற்கட்டுடன், நல்லபடி அவர்கள் சட்டத்தைக் காத்துவிடுவார்கள் என்று ரங்கனைப் ப்ராத்திக்கிறேன்.

இந்த வருட சுஜாதா அவார்ட்ஸ்..

எல்லா வருடத்தையும் நம்பிக்கையாய் ஏற்றுக்கொள்ளும் மிஸ்டர் பொதுஜனத்திற்கு..


தயவு செய்து நான் கேட்காமல் எனக்கு டைரி அனுப்பாதீர்கள் என்று இந்த வருடமும் ஆயிரத்து ஐம்பதாவது தடவை சொல்லியும் தவறாமல் அனுப்பிய அனைவருக்கும் நிறைய கவிதைகள் எழுதும் பிள்ளைகள் பிறக்க வேண்டுகிறேன்.

MISS YOU SUJATHA..

..