கொலையாளியைக் கண்டுபிடியுங்கள்..

நெற்றியில் இட்ட முத்தம் நெஞ்சுவரை இனித்திருக்கும் கெளசல்யாவுக்கு. புதுப்பொண்டாட்டியின் வாசனையில் அலுவலகம் போகமறுத்து ஒற்றைக்காலில் நின்ற ஆனந்தை தள்ளி விட்டால், விழுந்து விடுவானோ எனத் தள்ளாமல் விட்டாள். மீண்டும் ஒரு முத்தம். கன்னக்கதுப்புகள் ஜிவ்வென்று சிகப்பாக மாறத்தொடங்கியது.

“கிளம்புங்க.. டைம் ஆச்சு”

“ நிஜமாவே கிளம்பவா?”

“கிளம்புங்க.. ஈவ்னிங் சீக்கிரம் வந்துருங்க”

கிள்ளினான்.துள்ளினாள்.சிரித்தான்.வெடித்தாள். பீப் பீப் என ரிவர்ஸ் கியர் சத்தம் முடிந்தவுடன் வ்வ்ர்ரூம்க்கு வாகாக வாட்ச்மேனின் சல்யூட்டும் சில நொடிகளில் கேட் மூடப்படும் சத்தமும் கேட்டு சமையலறைக்கு நடந்தாள்.

ஆனந்த்.. தமிழ்நாட்டின் குறிப்பிடத்தக்க இளம் தொழிலதிபன்( ‘ர்’ க்கு இன்னும் 10 வருடங்கள் இருக்கிறது) சாதாரண அழகு.அசாதாரண பணம். வேகம் வேகம் எதிலும் வேகம்.அப்பா பணத்தை கரியாக்கி காசு பார்ப்பவன். வெடி பிஸினஸ். மொத்தமாக வாங்கி தென் ஆப்பிரிக்காவுக்கும் சீனாவுக்கும் ஏற்றுமதி. மொத்த வியாபாரத்தில் மொத்தமாக சில்லரை பார்ப்பவன். தம்பியுடனும், சித்தப்பாவுடனும் கூட்டாக செய்துவந்தவன் தம்பியின் போக்கு பிடிக்காமல் பிரிந்து விட்டான்.

தொழிலில் முதல் எதிரியும் சொந்தத்தில் முதல் நண்பனும் அவன் தம்பி ரவிதான்.அண்ணன் மீது மிகுந்த பாசம் வைத்திருப்பவன். அழகன். திறமையானவன்.ஆனால் வாழ்க்கை வாழ்வதற்கே என்று நினைப்பவன். லாகிரிவஸ்துக்கள் அதிகம். அவ்வப்பொழுது பாங்காங்கில் இருக்கும் பட்டயாவுக்கு போய்வருபவன். அங்குள்ள மஸாஜ்பார்லர்கள் போல் தமிழ்நாட்டில் கொண்டுவரும் தலைவருக்குத்தான் தனது ஓட்டு என்று கூறுபவன்.

சித்தப்பா இன்னமும் ரவியுடம் தொழில் செய்து வருகிறார்.பாசமானவர். ஒரே மகள். நிறைய அனுபவம் உள்ளவர். ரவி மீதும் ஆனந்த் மீதும் அன்பு வைத்திருக்கும் சித்தப்பா. அண்ணன் மறைவிற்குப் பிறகு குடும்பத்தையும் அண்ணன் மகன்களையும் வழிப்படுத்தியவர் என்பதால் அவர் மீது எப்பொழுதும் ஆனந்திற்கு மரியாதை உண்டு.

கெளசல்யாவை மணமுடித்தது ஆனந்தைப் பொறுத்தவரை மிகவும் அதிர்ஷ்டவசமானது. அவளது குழந்தைத்தனமான முகமும், தங்க நிற அங்கமும் அவனை அவள் வசம் கட்டிப்போட்டது.இந்த தேன்நிலவு நாட்களில் அதிகம் லயித்து வாழ்வை சுகித்துக்கொண்டிருந்தான்.

அலுவலகம் அடைந்தவுடன் தொலைபேசியை தன்பக்கமாக இழுத்து வழக்கம் போல் வீட்டிற்கு அழைத்தான். வழக்கம் போல் சிங்கிள் ரிங்கில் ரிங்கியது. கட் செய்துவிட்டு மீண்டும் அழைத்தான். இப்பொழுதும் சிங்கிள் ரிங் என்றாலும் உடனே ஸ்வாப் செய்தாள்..

“ஹலோ..”

“ ஹலோ கெள.. இப்பவும் உங்க அம்மாகிட்டத்தான் பேசிட்டு இருந்தயா?”

“ஆ..ஆமங்க.. i'm missing home"

"ம்.கூல் அண்ட் ரிலாக்ஸ்.. கொஞ்ச நேரம் கழிச்சு போன் பண்றேன்.. ஓக்கேயா?”

“k. சீக்கிரம் வாங்க”

“வில் ட்ரை. பை”

ரிசீவரை வைத்துவிட்டு டேபிள் மேல் இருக்கும் முக்கிய வேலைகளின் பட்டியலைப் பார்த்தான். அதற்குப் பக்கத்தில் ஒரு கவர். நான்கு மூலையிலும் கறுப்பு மை தடவி சற்று வித்தியாச கவனம் பெற்றது.

வெள்ளைக்கவர். யார் பெயரும் குறிப்பிடப்படவில்லை. எடுத்தான்.

"ராஜ்”

“ஸார்”

“இந்தக் கவர்”?

“ஸார். ஒருத்தர் வந்து உங்க கிட்ட கொடுக்கச்சொல்லிட்டு போனார் ஸார். யாருன்னு கேட்டதுக்கு உள்ள விவரம் இருக்குன்னு சொல்லிட்டாரு ஸார்”

“ஓக்கே”

என்று உதடுகள் சொன்னாலும் மனதின் ஓரத்தில் ஒரு இனம்புரியாத கனம் சேர்ந்தது அந்த லேசான கவரைப்பார்த்து.

கிலியோடு கிழித்தான்.

நல்ல ஃபாண்ட் சைஸில் வார்த்தைகள் ஓடியது.
.....
அன்புள்ள ஆனந்த்.

வணக்கம். நான் யார், எதற்கு இந்த கடிதம் என்று யோசித்து கொண்டிருப்பதை விட்டு மேலே படிக்கவும்.

நீ உத்தமி என்று நினைத்து கொண்டிருக்கும் உன் ஆசை மனைவி ஒன்றும் உத்தமி அல்ல. உன் சொத்திற்காக நடத்தபடும் நாடகத்தின் முக்கிய பாத்திரம் ஏற்று நடித்துகொண்டிருக்கும் ஒரு மானங்கெட்டவள்.சதா போனில் திட்டங்கள் தீட்ட படுகிறது.இன்னும் ஒரு வாரத்திற்குள் உன் கதை முடிக்க படும் என்பதால் பாதுகாப்பாக இருக்கவும்.

இப்படிக்கு
உன் நலம் விரும்பி
.....

27வது தடவையாக படித்தான். 27 தடவையும் தண்ணீர் குடித்திருந்தான்.

போனை இழுத்தான். மனமின்றி வைத்து விட்டான். மீண்டும் இழுத்தான். அழுத்தினான். சிங்கிள் ரிங்.

மறுபடியும் அழைத்தான். ஸ்வாப்பிங்கிள் வந்தாள் கெளசல்யா.

“சொல்லுங்க”

“ஹ.. ஹலோ.. கெள”

“சொல்லுங்க”

“ இல்ல.. யார் லைன்ல இருந்தா?”

“இப்பத்தான் சமையல் முடிஞ்சது.அம்மாகிட்ட பேசலாம்னு கூப்பிட்டேன்.. நடுவுல உங்க போன் வந்தது.. அதான் அப்புறம் கூப்புடுறேன்ன்னு சொல்லிட்டு இருக்கும் போதே மறுபடியும் கூப்பிட்டீங்க. சொல்லுங்க”

“ஜஸ்ட் லைக் தட் கூப்பிட்டேன்.இரு இன்னொரு கால் வருது. அப்புறம் கூப்புடுறேன்”

“ஓக்கேகே”

என உற்சாகமாக வைத்தாள். நன்றாகத்தானே பேசுகிறாள். ஆனாலும் எப்பொழுது அழைத்தாலும் எங்கேஜ்டாகத்தான் இருக்கிறது. அந்த முகம் தப்பு செய்யக்கூடிய முகமா?

வேர்த்தது. ஏசியின் அளவை மாற்றினான். சிவக்குமார்.அவனது நண்பன்.இன்ஸ்பெக்டர். ஒரு ஹலோவில் அவனை வரவழைத்தான்.

“ம்.. இதெல்லாம் சகஜம் ஆனந்த். உன்னோட தொழில் எதிரிங்களுக்கு உன்மேல இருக்குற பொறாமைல இதுமாதிரி செய்வாங்க.. ஸோ ரிலாக்ஸ்”

“எனக்கும் அப்படித்தான் தெரியுது. இருந்தாலும்..”

“விடு.. let me have a look in this" நீ ஜாலியா ஹனுமூன் டேஸ என் ஜாய் பண்ணு”

கடிதத்தை ஒரு நகல் எடுத்துக்கொண்டு போய்விட்டான்.

கெளசல்யாவின் அம்மா வீட்டிற்கு போன் பண்ணலாம என நினைத்தவன் செயல்படுத்தினான். எங்கேஜ்டு டோன் வந்தது. நிம்மதியாய் வேலையைப் பார்க்கத்தொடங்கினான்.

“லாரி மோதி இளம் தொழிலதிபர் அகால மரணம்”

என்ற செய்தி ஆனந்தின் மரணத்தைப்பற்றியது தான். அழுது அழுது வீங்கிய முகத்துடன் இருந்த கெளசல்யா எதுவும் பேச முடியாத அளவு பலஹீனமாக இருந்தாள்.

ரவி,ஆனந்தின் மாலைப் போட்ட படத்தை வெறித்திப் பார்த்துக்கொண்டிருந்தான். சித்தப்பா அழுத அழுகை அந்தத தெரு முழுதும் கேட்டது.

இன்ஸ்பெக்டர் என்பதையும் மீறி சிவா தன் நண்பனை காக்க முடியாமல் போனதை எண்ணி துக்கம் தொண்டை அடைக்க நோட்டம் விட்டுக்கொண்டிருந்தான்.

வந்த கூட்டம் அதிகம். கெளசல்யாவின் பெற்றோர் அதிகம் பாதிக்கப்பட்டிருந்தார்கள். ஆறுதலாக அவளை அரவணைத்து அமர்ந்திருந்தாள் கெளசல்யாவின் அம்மா.

ரவியிடம் துவங்கினான் சிவா..

“சொல்லுங்க சிவா.. இனி அண்ணனத் தேடி நீங்க வரமுடியாது..” சொல்லிவிட்டு வெடித்து அழுதான்.

“ரவி.. ஒரு விசயம்.. இது ஆக்ஸிடெண்ட்னு நினைக்கிறீங்க.. இதுல ஒரு விசாரணை பண்ண வேண்டிய அவசியம் இருக்கு”

ஆச்சர்யமாகப் பார்த்த ரவி.. “என்ன விசாரணை சிவா?”

ஒரு வாரத்திற்கு முன் நடந்த நிகழ்வைச் சொன்ன இன்ஸ்பெக்டர்..

“ஸாரி ரவி.. உன்னையுமே நான் சந்தேகப்பட வேண்டிய நிலை.. அதனால”

“அதனால..”

“கொஞ்ச நாளைக்கு முன்னால ஏதாவது வாக்குவாதம் மிஸ் அண்டர்ஸ்டேண்டிங் ஆனந்தோட உங்களுக்கு இருந்ததா.. வேற யார்கூடயாவது இருந்தது தெரியவந்ததா?”

“ச்சான்ஸே இல்ல சிவா..”

“ அண்ணியப் பத்தி நீங்க என்ன நினைக்கிறீங்க?”

"she is a gem..பாவம் அவங்க.. அண்ணன நம்பி வந்தாங்க..ச்சே”

“அங்க நிக்கிற சிகப்புக் கலர் சட்டை யாரு?”

“சித்தப்பாவோட பி.ஏ. ராகவ்”

“கூப்புடுங்க”

“ராகவ்”

“எஸ் ஸார்”

“ எத்தன வருஷமா வொர்க் பண்றீங்க?”

“5 வருஷமா ஸார்”

“ஆனந்த் ஸார் பத்தி சொல்லுங்க”

“என்ன சொல்ல ஸார்? ரொம்ப நல்லவர். அநியாயமா செத்து போயிட்டாரு”

“ஓக்கே, வேற ஏதாவது?”

“ரொம்ப திறமையானவர். எனக்கு அவர ரொம்ப பிடிக்கும் ஸார். ”

“ரைட்..”

வெளியே வந்து ஒரு கிங்ஸை பற்ற வைத்தான் சிவா.

“ கண்ணீர் அஞ்சலி”
ஆனந்த் கம்பெனி ஓனர் மறைவிற்கு அஞ்சலி

தமிழ் நாட்டின் முக்கிய தொழிலதிபரான எங்கள் முதலாளியின் மறைவிற்கு கண்ணீர் அஞ்சலியை காணிக்கையாக செலுத்துகிறோம்”

போஸ்டரைப் பார்த்துக் கொண்டிருந்த சிவா சிகரெட்டை பாதியில் அணைத்துவிட்டு உள்ளேப் போய் ரவியிடம் கேட்டான்

“ரவி.. இவ்வளவு சீக்கிரமா போஸ்ட்டர் எப்படி அடிச்சு வந்தது?”

“ எல்லாம் ராகவ் பார்த்துகிட்டாரு”
...

சொல்லுங்க ராகவ் உங்களுக்குத் தெரியும் யார் குற்றவாளின்னு.. உண்மைய நீங்களாச் சொல்றீங்களா?
---

எப்படி ராகவைச் சரியாகக் கேட்டார் சிவா.

..