யாரறிவார்?

“ஹலோ ஸார் ici bank ல இருந்து பேசறேன்”

“ ”
“ஹலோ.. ஸார் பேசுங்க ஸார்”

“ஹலோ சொல்லுங்க”

“என்னத்தச் ஸார் சொல்லச் சொல்றீங்க, போன் பண்ணா எடுக்க மாட்டீங்கறீங்க,எடுத்தா பேச மாட்டீங்கறீங்க, எப்ப ஸார் செட்டில் பண்ணப்போறீங்க?”

“பாஸ்,நான் தான் சொல்லிட்டேன்ல நேத்தே, ரெண்டு நாள் டைம் குடுங்க செட்டில் பண்றேன்னு”

“ ரெண்டு நாள் ரெண்டு நாள்னு எத்தன தபா சொல்வீங்க ஸார்,எனக்குத் தெரியாது, நாளாண்னிக்கு செட்டில் பண்ணலேண்ணா நடக்குறதே வேற”

“யாருங்க போன்ல,கிரடிட் கார்டு கடன்காரன் தானே?”

கேட்ட மனைவியை பச்சாதாபம்,சுயவிரக்கம்,என அத்தனை உணர்ச்சிகளையும் சேர்த்துப் பார்த்தான் மூர்த்தி.
அவனும்தான் என்ன செய்வான், வீட்டுக்கடன்,குழந்தை, அம்மா, தம்பி என உறவுக் குதறல்களால் சிலவுச் சிதறல்கள்.

வழக்கமாக,இருபதாம் தேதிக்கு பிறகு பார்ப்பவர்களிடம் கேட்டு,கொடுப்பவர்களிடம் வாங்கி என ஒப்பேத்திவிடுவான். அந்த கால கட்டங்களில் தான் வந்தது இந்தச் சனியன். இன்று போல் உள்ளது அந்த நாள்,

“ஸார், மூர்த்திங்கிறது ?”

“ நீங்க?”

“ப்ளூ டார்ட் கொரியர்ல இருந்து வர்றேன் ஸார், உங்களுக்கு கிரெடிட் கார்ட் வந்துருக்கு, உங்க ஐடி கார்டு ஏதாவது இருந்தா காமிங்க”

அதற்குப் பிறகு அவன் பேசிய எதுவும் காதில் விழவில்லை. அந்த பிளாஸ்டிக் கார்டில் பொன் எழுத்துக்களால் பதிக்கப்பட்ட தன் பெயரை தடவி தடவிப் பார்த்துக் கொண்டே பறந்தான். ‘ந்’ ரொம்ப தூரம்.

அங்கு ‘ந்’தத் தொடங்கியவன் தான். மனைவி லேசான கோபமாக இருந்தாலும், “வாம்மா, சேல கேட்டியே” என்று வாங்கித் தரத் துவங்கியவன் துவண்டுவிட்டான்.

லப்பர் செருப்பில் இருந்து லெதருக்கு என மாறத்தொடங்கினான். “சுரண்டினால் போச்சு” என்ற வார்த்தை சர்வசாதாரணமாகிப் போனது அவனுக்கு.

இப்பொழுது அதை நினைத்துப் பார்த்து எந்தவித பிரயோஜனமும் இல்லை. இது போக தனிநபர் லோன் emi வேறு இருக்கிறது ஒரு 2 மாத பாக்கி, என்ன செய்வது.

நண்பர்கள் எல்லாம் ந அளவிலேயே இருக்கிறார்கள் அல்லது நா அளவிலேயே.

ம்ஹூம்.அதுதான் ஒரே வழி.

முடிவெடுத்தான். ஒரு முறை ஆசையாய் மனைவி,குழந்தையைப் பார்த்தான். தூங்கிக்கொண்டிருந்த தாயை வணங்கினான். தயங்கித் தயங்கி வெளியே வந்தவன் மெடிக்கல் ஷாப்பில் அம்மாவிற்கு என்று சொல்லி, வாங்கியே விட்டான்.இனி விடுதலை,விடுதலை என்று நினைத்துக் கொண்டான்.

திட்டமிட்டபடி, எல்லா மாத்திரைகளையும் விழுங்கியவன், அமைதியாய், ஆனந்தமாய் நினைத்தப் படியே செத்துப் போனான்.




“ஹலோ மூர்த்தியா? நான் ‘ici டெட் டிவிஷன்ல’ இருந்து பேசறேன். செத்து நாளு நாள் ஆச்சு போல.. எப்ப செட்டில் செய்யப் போறீங்க?”

------
..