தமிழுக்கு அமுதென்று பெயர்... தமிழனுக்கு?

மேனேஜ்மெண்ட்டில் ஒரு வாசகம் சொல்வார்கள்...

“Don't re invent a wheel again"

அதாவது “நேரத்தை வீணடித்து,மீண்டும் சக்கரத்தை கண்டுபிடித்துக் கொண்டிருக்காதே”(புரியாதவர்களுக்கு: சக்கரம் தான் முதல் விஞ்ஞான கண்டுபிடிப்பு)

அது போலத்தான் இப்பொழுது இருக்கும் சூழலும் மனநிலையும்.

இந்திய வரைபடத்தின் அடியில் இருக்கும் தமிழ்மக்களின் கண்ணீர்த்துளிகள் மொத்தமாக உறைந்து தேங்கி நிற்பது போன்ற இலங்கை வரைபடம் இருப்பது இயற்கையின் சதியாகத்தான் இருக்க வேண்டும்.

தமிழ், தமிழ், தனித் தமிழ்நாடு என்ற முழக்கங்கள் 60 களில் வீரத்தின் அடையாளமாகவும் பின்னர் அதுவே ஆட்சிக்கான அடிப்படை முழக்கமாகவும் மாறிப்போனதென்பது செய்தி.

‘ கனியிடை ஏறிய சுளையும் முற்றல்
கழையிடை ஏறிய சாறும்
பனிமலர் ஏறிய தேனும் காய்ச்சுப்
பாகிடை ஏறிய சுவையும்
நனிபசு பொழியும் பாலும் தென்னை
நல்கிய குளிர் இள நீரும்
இனியம் என்பேன் எனினும் தமிழை
என்னுயிர் என்பேன் கண்டீர்’

என்ற பாரதிதாசனுக்கு அன்றே தெரிந்திருக்கிறது.. தமிழைத்தான் என்னுயிர் என்று சொல்லவேண்டும் என்றும், தமிழனை என்னுயிர் என்று சொல்லி, அதை தனக்குப் பின் வரும் சந்ததியினர் பின்பற்றமாட்டார்கள் என்பதும்.

‘ நீயோ கருமான் செய் படையின் வீடு
நான் அங்கோர் மறவன் கன்னல்
பொருள் தரும் தமிழே நீ ஓர்
பூக்காடு நான் ஒரு தும்பி..’

என்று சொன்னாயே பாரதி தாசா... பூக்காடெல்லாம் சாக்காடாகி அச் சுடுகாட்டின் சூடு தனிய இன்னுமோர் நூற்றாண்டு ஆகும் என்பதுனக்கு தெரியப்போவதில்லை. வேதிவினை குண்டுகளின் சத்தம் சில சில்லறை புரண்ட சத்தத்தில் யாருக்கும் கேட்கவில்லை.கேட்கப்போவதில்லை. கேட்டாலும் அதைப் பற்றி கேட்கப் போவதில்லை.

என்ன நடந்து கொண்டிருக்கிறது?

எவ்வளவு உறுதியும் தீரமும் காட்டுகிறார் கலைஞர்? கிடைக்கவேண்டிய மந்திரி பதவிகள் கிடைக்கவில்லை என்றால் ஆதரவை வெளியில் இருந்து தரப்போவதாக உடனே சொல்கிறார், வீட்டில் இருக்கும் சிறுபிள்ளைகள் மிட்டாய் தரவில்லை என்றால் கோவித்துக் கொண்டு கொல்லைப் பக்கம் போய் அமர்ந்துவிடுவது போல பதவியேற்பு விழாவை புறக்கணித்து விமானமேறிவிட்டார்.

இந்தத் தீரத்தில் ஒரு சதவீதம் ஆரம்பத்தில் ஈழமக்கள் மீது காட்டி இருந்தால் உயிர்கள் காக்கப் பட்டிருக்கும். என்ன செய்ய? திருவேங்கடம் வேலுப்பிள்ளை பிராகரன் தானே..அவர் என்ன திருக்குவளை கருணாநிதி பிராபகரனா? ஒரு வேளை உங்கள் வாரிசாக இருந்திருந்தால்,எப்படி அழகிரிஅண்ணனுக்கு(!) மந்திரிப் பதவிக்காக சண்டைபோடுகிறீர்களோ அது போல ஈழத்திற்கு ஏதாவது செய்திருப்பீர்களோ என்ற நப்பாசையின் நா அசைவுதான் மேற்சொன்ன தி,க,பி.

இனி செல்வி ஜெயலலிதா மேடத்தை ஒன்றும் சொல்ல முடியாது. கேட்டால் “அதான் ஜெயிக்க வைக்கவில்லையே.. இல்லை என்றால் இத்தனை நேரம் தனிஈழம் அமைத்தே தந்திருப்பேன்.. இனி தேர்தல் வரை No Comments ”என்ற நுனிநாக்கு ஆங்கிலத்தோடு(அண்ணாவிற்குப் பிறகு ஆங்கிலம் பேசும் முதல்வர்!) முடித்துக் கொண்டு, கொடநாடோ கொடைக்கானலோ.. .

முதலில் சொன்ன அந்த சக்கர கண்டுபிடிப்பு தான்... தமிழ், தமிழன், வரலாறு, இலங்கை என்று மீண்டும் பேசிக் கொண்டுதான் இருக்க வேண்டி இருக்கிறது. ஏனெனில் அதிகாரம் கையில் இல்லாமல் என்ன பேசி என்னவாகப் போகிறது?

உலகமே அதிகாரத்தின் கையில் தான் இயங்குகிறது என்றார் ஃபூக்கோ.. அந்த அதிகாரம் யார் கையில் இருக்கிறது என்பதில் தான் இயக்கங்களின் இயக்கம் இருக்கிறது என்கிறேன் நான். இத்தாலி நாட்டு அதிகார செம்மையில் ஓர் இனப் படுகொலைக்கு சாட்சியாகிப் போன சமகால மக்களாகிவிட்டோமே என்ற கவலை அரிக்கிறது. ஹிட்லர் கொன்ற கொலைகளை படித்துவிட்டு விட்டு விட்டோம். ராஜபக்‌ஷேவின் கொடூரங்களை பார்த்துவிட்டு விட்டு விட்டோம்.

அசோகர் மரம் நட்டார், ஹிட்லர் சர்வாதிகாரி, அக்பர் தீன் இலாஹி உருவாக்கினார் என்ற வரலாற்று வரிசையில் ராஜபக்‌ஷே இனப்படுகொலை செய்தார் என்பதும் இணைந்து விடும். ஒரே ஒரு வித்தியாசம், கடைசியாகச் சொன்ன விசயத்திற்கு சாட்சிகளாகிப் போனோம்.

தமிழுக்கு அமுதென்று பெயர்.. தமிழ்நாட்டுத் தமிழனுக்கு? அமிலம்?

ப்ச்.

..