கம்பர்...சினிமா பாடல்கள்...சீதையழகு..சந்தம்...

டி.ராஜேந்தர் என்ற பெயரை கேட்டதும் இதழோரம் ஒரு புன்முறுவலும் அவரின் தாடியும் அதை கோதிவிட்டுக்கொண்டே ‘தங்கச்சி..’ என்று அவர் சிலுப்பும் வார்த்தையும் நினைவில் அரை நொடி ஃப்ளாஸாக வந்து போய்விடுகிறது. என்றாலும் அவரின் மொழிவளம்(தமிழ் எம்.ஏ)மிகவும் ஆழமானது.

வசந்த காலங்கள் இசைந்து பாடுங்கள்
புதுமுகமான மலர்களே நீங்கள்
நதிதனில் ஆடி கவி பல பாடி
அசைந்து அசைந்து ஆடுங்கள்

என்று ரயில் பயணங்களில் படத்தில் அவரின் வார்த்தைகள் புருவமுயர்த்த வைத்தது அனைவரையும்..

அவள் மைவிழிக் குளத்தில்
தவழ்வது மீனினமோ
கவி கண்டிட மணத்தில் கமழ்வது
தமிழினமோ

செம்மாந்த மலர்கள்
அண்ணாந்து பார்க்கும்
உன் காந்த விழிகள்
ஒரு ஏகாந்த ராகம்
தெம்மாங்கில் பாட
ஏதேதோ குயில்கள்

என்று அடுத்தடுத்த வரிகளில் ரைமிங்கோடான வர்ணனைகள் மிக அற்புதமாய் இருக்கும்.அதுவும் மலரையும் மீனையும்,குயிலையும் உவமைகளாக ஒப்பிட்டு அழகை பாடியது ரசிக்கப்பட்டது.

“அன்ன நடை..பின்னலிடை..’ என அவ்வப்பொழுது பிற உயிரினங்களை ஒப்பிட்டு,ஒரு காதலனின் பார்வையில் காதலியை வர்ணிப்பதாக இது ஆண்டாண்டு காலமாய் தொடர்ந்து கொண்டே தான் இருக்கிறது.

லில்லி மலருக்கு கொண்டாட்டம் உன்னைப் பார்க்கையிலே...என எம்ஜியார் உதட்டை சுழித்து,கடித்து பாடும் பொழுது மஞ்சுளா வெட்கப்படுவதை விட லில்லி மலர் வெட்கப்படுவது போல தோற்றத்தை ஏற்படுத்திய வரிகள்..

மாஞ்சோலைக் கிளிதானோ,மான் தானோ வேப்பம் தோப்புக் குயிலும் நீதானோ..என பாடலாசிரியரின்(முத்துலிங்கம்) கற்பனையில் அனைத்து ஜீவராசிகளையும் காதலியுடன் ஒப்பிடப்பட்ட பாடலும் அந்த வகையே.

நவீன வாழ்க்கைக்கு ஏற்ப.. இந்த ஒப்பிடல் மாறிக்கொண்டே வந்து..

டெலிபோன் மணிபோல் சிரிப்பவள் இவளா
மெல்போர்ன் மலரின் மெல்லிய மகளா

என ஒப்பீடுகள் காலத்தோடு ஒத்து பயணித்துக்கொண்டே இருக்கிறது.

இது இன்று நேற்றல்ல..சங்க காலத்தில் ஆரம்பித்து வைக்கப் பட்ட பழக்கமாகவே படுகிறது.

இதோ சீதையின் அழகை கம்பரின் வரிகள் சொல்லும் இந்தப் பாடல் அதற்கு ஒரு சான்று.

விளக்கம்.


மெல்லிய இடையைக் கண்ட வஞ்சிக்கொடியானது வெட்கப்பட்டு ஒதுங்கிக்கொள்ள,நடையழகைப் பார்த்ததும் அன்னப்பறவைகள் பயந்து ஒதுங்கிக்கொள்ள,கால்களைப் பார்த்து வெட்கி தாமரை நீருக்குள் மறைந்து கொள்ள,கண்களைக் கண்ட மீன்கள் ஓட,பஞ்சை விட மென்மையான பாதங்களை உடைய சீதை நீராடினாள்.

பாடலின் சிறப்பு

சீதை நீராடும் அழகை வர்ணிக்கும் பாடல் என்பதனால், தண்ணீரில் காணப்படும் வஞ்சிக்கொடி,அன்னம்,தாமரை,மீன்கள் போன்றவற்றை மட்டுமே பாடுபொருளாக எடுத்தாண்டதே கம்பரின் சிறப்பு.அவையனைத்தும் சீதையின் அழகைப் பார்த்து தோல்வியடைந்ததாக அற்புதமான கற்பனையாக கையாண்டது.

பாடல்.

வஞ்சி நாண இடைக்கு, மடநடைக்கு
அஞ்சி அன்னம் ஒதுங்க, அடியன்ன
கஞ்சம் நீரில் ஒளிப்பக் கயலுகப்
பஞ்சி மெல்லடிப் பாவையும் ஆடினாள்

அற்புதம்.


..