வரும்...ஆனா வராது...

“என்ன பாஸ் டல்லா இருக்கீங்க?”

“ சும்மா வீட்டு நினைப்புதான்..”

“ஏதாவது விக்ரமன் படம் பார்த்தீங்களா?லாலா லல்லானு”

“ஏன்யா நீ வேற..”

“சும்மா ஜாலிக்கு சொன்னேன்..என்னாச்சு?”

“இல்ல.. இங்க வெளிநாட்டுல வேலைக்கு வந்துட்டோம்..அவங்களும் நம்ம கூடயே வந்தா நல்லாத்தான் இருக்கும்,ஆனா..வராம இருக்குறதே நல்லதுதான்”

“என்னப்பா.. வரும்..ஆனா வராது.. மாதிரி நல்லாத்தான் இருக்கும் ஆனா நல்லா இருக்காதுன்னு சொல்ற”

“ஆமாப்பா..நம்ம கூடவே அவங்களையும் இங்க கூட்டிட்டு வந்தா கொஞ்சம் மைண்ட் ரிலாக்ஸா இருக்கும்.சேர்ந்து இருக்குற சுகம் நல்லாத்தான் இருக்கும்.ஆனா..இங்க பாஷை,கல்ச்சர் எல்லாமே அடியோட வேற..சொந்த பந்தமும் இல்லாம வெறிச்சு பார்த்துட்டு இருக்கணும் பாவம்.ஹும்”


“நீ சொல்ற பாயிண்ட் கரெக்ட்டா தப்பான்னு உங்க வீட்ல தான் டிஸைட் பண்ணனும்.ஆனா... உன் ஃபீலிங் மாதிரியே, அவங்க கூட இருந்தா நல்லாத்தான் இருக்கும்,ஆனாலும் அவங்க வந்து கஷ்டபடுறதுக்கு வராம இருக்குறதே மேலுன்ற அர்த்தத்துல, அந்தக்காலத்துல “சிறைக்குடி ஆந்தையார்”ன்ற புலவர் நீ பாவமா ‘உச்’ கொட்டுறதவிட இன்னும் சூப்பரா சொல்லி இருக்காரு..”

“அப்பிடியா?”

விளக்கம்:

பாலை நிலத்தில் வேட்டையாடித் திரியும் செந் நாய்,மணலைக்கிளறி தண்ணீர் குடித்து விட்டு போன அந்த மிச்ச நீரில்,காட்டுப் பூக்கள் விழுந்து அழுகி இருக்கும் அந்த கொஞ்ச நீரை அழகிய வளைக் கைகள் கொண்ட, என் நெஞ்சத்தில் அமர்ந்து இருப்பவள், என்னோடு குடிக்க நேரிடும்..(அல்லது குடிக்க வேண்டும்) பாவம்.

சிறப்பு :

நேரடியாக கூறாமல் அளியளோ அளியள் என்று தொடர்ச் சொல்லில் அவள் மீதிருக்கும் பாசத்தை உணர்த்தி,உடன் வந்திருந்தால் ஏற்படும் அவல நிலையை குறிக்கும் பாடல்.வேட்டச் செந்நாய் போன்ற வார்த்தைகளினால் காட்சி கண்முன் விரிவதும் சிறப்பே.

பாடல் :

வேட்டச் செந்நாய் கிளைத்தூண் மிச்சில்
குளவி மொய்த்த அழுகற் சின்னீர்
வளையுடைக் கைய ளெம்மோ டுணீஇயர்
வருகதில் அம்ம தானே
அளியளோ அளியளெந் நெஞ்சமர்ந் தோளே.

பாலைத் திணையில் தலைவன் கூற்றாக புலவர் சிறைக்குடி ஆந்தையார் பாடிய பாடல்.

இதை தற்கால கவிதையாக எழுதவேண்டும் எனில்..

நான் போகும் பாதை
சுடுமணல் நீண்ட பாலை
வேட்டைச் செந்நாய்
பறித்த பள்ளத்தின்
எச்ச நீரைப் பருகுவேன்
நான்-அழகியே..
அழுகிய காட்டுப்பூக்கள்
மிதக்கும் அந்
நீரைப் பருகலாமா நீ?
என்
நெஞ்சத்தின் பாதியே
வரவேண்டாம் என்னோடு..
பாலை பயணப் பாவம்
போகட்டும் என்னோடு.

..