தமிழ் சினிமாவும் பாடல்களும்

"அதுவும் இதுவும் போல" என்று கல்யாண வீட்டு மைக்கில் அரசியல்வாதிகள் உவமைகளாக முழங்குவது போன்ற உவமைகள் எதுவும் சொல்லாமலே.. தமிழ் சினிமாவும் பாடல்களும் எவ்வளவு நெருங்கிய தொடர்புடையவை என்பது அனைவரும் அறிந்த ஒன்று..

முன்பெல்லாம் 40 பக்க நோட்டு சைஸில் வந்த பாட்டு புத்தகங்களும், சிங்கமே கொல்ல வந்தாலும் அதைப் பாடிப்பாடியே சாம்பலாக்கும் காட்சிகளும்,பாடல்களுக்கு ஊடே சில வார்த்தைகள் வசனங்களாக (விளம்பர இடைவெளிகளுக்கிடையில்,இந்திய தொலைக்காட்சியில் முதல்முறை பார்க்கும் படங்கள் போல) இருந்த தமிழ் சினிமாக்கள் தொடங்கி நாளை வரப்போகும் படங்கள் வரை பாடல்களின் பங்கு மிக முக்கியமானவை..

பாடல்கள் தமிழ் இலக்கணத்தை மையமாக கொண்டிருப்பதாகவே படுகிறது

மெலடி பாடல்கள் பெரும்பாலும் மெல்லினமான "ஞஙண நமன‌ " எழுத்துக்களை எதுகையாக கொண்டதாகத்தான் இருக்கும்.. "எங்கேயும்".. "அஞ்சும் கெஞ்சும்".. "செந்தமிழ் தேன்".."என்னவளே".. "குங்கும பொட்டில் மங்களம்".. "தங்கத்தாமரை".."தங்க மகன் இங்கு" "ஓம் சாந்தி ஓம்".. வரை..

வீரமான/ஆக்ரோசமான‌ பாடல்கள் பெரும்பாலும் வல்லினமான "கசட தபற".. "அச்சம் என்பது".. "படைகள் எழுகவே.." "சத்தம் இல்லாத தனிமை"


ஆலங்குடி சோமு,கு.மா.பாலசுப்ரமணியம்,மருத காசி, கா.மூ செரீப்..>(ஏரிக்கரை .. பாடலை மறக்க முடியுமா?) என்ற ஜாம்பவான்கள் பாடல்களாக எழுதித்தள்ளிக்கொண்டிருந்த காலகட்டத்தில் பட்டுக்கோட்டை கல்யாண சுந்தரத்தின் என்ட்ரி மிக முக்கிய திருப்பத்தை ஏற்படுத்தியது.. பிறகு சிறிது காலம் பட்டுக்கோட்டையாரின் ஜனரஞ்சக வார்த்தைகளின் ஊடே கருத்துக்களை பரப்பும் கொள்கைப்பாடல்கள் வெகுவாக மக்களால் ரசிக்கப்பட்டது.. திருடாதே என்ற பாட்டா.. திருட்டை பற்றி மட்டுமே எழுதுவார்.. தூங்காதே தம்பியா.. தூக்கத்தை பற்றி மட்டுமே இருக்கும்.. (கண்ணதாசனின் தத்துவபாடல்களில் கூட சரணத்தில் காதலுக்கு சென்று பின் தத்துவத்திற்கு திரும்பும்)இது பட்டுக்கோட்டையாரின் ஸ்பெஷாலிட்டி..

பாகப்பிரிவினையின் முதல் பாடலை எழுதி முடித்த கையோடு பட்டுக்கோட்டை கல்யாண சுந்தரம் இறந்துவிட்டதால்.. அதை ஈடு செய்யும் பொருட்டு, மிகுந்த மெனக்கெடலின் முடிவில்.. அனைத்து பாடல்களிலும் தன் பெயரை உச்சரிக்க வைத்த கண்ணதாசன் தன் கடைசி மூச்சு வரை கவியரசராக தனி ராஜ்ஜியம் நடத்தியது அனைவரும் அறிந்ததே.."அத்திக்காய் காய்" பாடலில் இவர் கையாண்ட இலக்கிய விளையாட்டு இன்றளவும் பிரசித்தம்.

வாய்ப்புகள் சரிவர அமையாததால் பெட்டியை கட்டி பலசரக்கு கடைக்கே திரும்பி விடலாம் என்ற எண்ணத்துடன் போய்க்கொண்டிருக்கும் பொழுது,மயக்கமா கலக்கமா என்ற பாடல்வரிகளைக் கேட்டு புத்துணர்ச்சியுடன் தன் மனதை மாற்றிக்கொண்டு முயன்று.. இன்று வரை பல தலைமுறை கடந்து வென்று வரும் வாலியின் பங்களிப்பு மிக முக்கியமானது..

தெய்வத்தாய் படத்தின் போது எம்ஜியாருக்கும் கண்ணதாசனுக்கும் ஏற்பட்ட சிறுகருத்து வேறுபாட்டால் வேறு யாராவது ஒரு கவிஞரை எழுதச் செய்ய வேண்டும் என்று ஆரெம் வீரப்பனிடம் எம்ஜியார் கூறிவிட்டதால்.. வாலியை அவருக்கு அறிமுகப்படுத்தினார்களாம்.. எதிர்பார்ப்பு ஏதும் இல்லாத காரணத்தால் அதிக கவனம் செலுத்தாமல் வேறு வேலையை பார்த்துக்கொண்டே வரிகளை கேட்டுக்கொண்டிருந்தாராம் எம்ஜியார்.. மூன்றெழுத்தில் என் மூச்சிருக்கும்.." என்ற வரிகளை வாலி சொன்னதும் புருவம் உயர்த்திய எம்ஜியார்(எம்ஜியாரின் வாழ்க்கையில் 3 எழுத்துக்கள் பெரும்பங்கு வகித்திருப்பது தெரிந்த விஷயம்)அதன் பிறகு வாலியின் வார்த்தைகளை கொள்கைப்பாடல்களாக பயன்படுத்தி ஆட்சியில் அமர்ந்தது வரை வாலியின் வரிகள் வலிமை மிக்கதாக பேசப்பட்டது..

தனக்கு பிடித்தமானதை
பிடித்துத் தருவான் என்று
தனக்கு பிடித்த மான் அதை
கேட்டாள்

என்று ராமாயணத்தை ஒருவரியில் எழுதுவதாகட்டும்,

இவர்கள் கண்மூடிப்போனதல்
மண்மூடிப்போக வில்லை..
மண்மூடிப்போனதால்
கண்மூடிப் போனவர்கள்..
(குஜராத் பூகம்பம் குறித்த கவிதையில்)

என்று வார்த்தை விளையாடும் இவர் இன்று வரை யூத் குத்து குத்துவதிலும் வல்லவர் என்பதால் வாலிபக் கவிஞர் வாலி என்று அழைக்கப்படுகிறார்.. சென்ற வாரம் பிறந்த நாள் கொண்டாடிய வாலி.. நீ நீடுழி வாழி..

பாரதிராஜாவின் வருகைக்குப் பின் தமிழ்த் திரை உலகம் சந்தித்த தித்திக்கும் மாற்றங்களில் ஒன்று வைரமுத்துவின் வருகை.. பொன்மாலைப் பொழுதாக தொடங்கி இவர் எழுதிய அத்தனை பாடல்களிலும் இவர் பெயரையும் எழுதாமலே எழுதியவர்.. நல்ல வார்த்தைகளை யார் எழுதினாலும் வைரமுத்துவாக இருக்குமோ என்று நம்ப வைத்தவர்..வைத்துக்கொண்டிருப்பவர்..

ஒன்று சுதந்திரத்தின்
வானம் இல்லை
மரணத்தின் பள்ளம்..

என வார்த்தைஜாலம்,விஞ்ஞானம்,இலக்கியம் என்று கலக்குவதால் கவிப்பேரரசராக திகழ்பவர்..கண்ணதாசனுக்கு இணையாக வைரமுத்துவும் இலைமறைகாயாக காமத்தைச் சொல்வதில் வல்லவர் என்பதற்கு நல்லவனுக்கு நல்லவன் படத்தில் வரும் என்னைத்தானே பாடலின் இடையில் வரும் வரிகளே சாட்சி

மலரின் கதவொன்று திறக்கின்றதா
மௌனம் வெளியேற தவிக்கின்றதா
பெண்மை புதிதாக சிரிக்கின்றதா
உயிரில் அமுதங்கள் சுரக்கின்றதா
...
இரவுகள் இதமானதே..

இந்தப் பாடலை மிக நுட்பமாய் கேட்டால்தான் மேலே சொன்ன சங்கதி தட்டுப்படும்.

வெயிலோடு நாம் விளையாடியதை வார்த்தைகளில் வடித்த நா.முத்துக்குமார்..

பெண்களின் கண்ணோட்டத்தில் காதலை ஆழமான அழகான வார்த்தைகளில் சொல்லிக்கொண்டிருக்கும் தாமரை,

உடைந்த நிலாவென கவிதைவடிவானாலும் சரி.. ஒவ்வொரு பூக்களுமே(பூ?) என்ற விருதுக்கான வரிகளாகட்டும் சரிவிகிதமாக எழுதிவரும் விஜய்,

இன்னும் பல‌ இன்றைய தலைமுறை பாடலாசிரியர்கள் தமிழ் சினிமாவில் பாடல்களின் பங்களிப்பை உறுதி செய்து கொண்டி(டே)ருக்கிறார்கள்..

பாடல்களை ஸ்ருதி சுத்தமாகவோ இல்லை வெறும் சத்தமாகவோ.. முணுமுணுத்துக் கொண்டே நாம் ரசிக்கும் இந்த பாடல்கள் நம்மில் ஒரு அங்கமாகவே தான் இருக்கிறது.. இருக்கும்..

..