திரு-மணம்-இரு-மனம்.

“கல்யாணம் ஆனவருக்கும் பேச்சிலருக்கும் என்ன வித்தியாசம் ?”

“பேச்சிலர்னா கட்டிலோட எந்தப் பக்கத்து வழியாவும் இறங்கிக்கலாம்”

நண்பனிடம் நகைச்சுவைக்காக சொல்லப்பட்டது என்றாலும் நிறைய அர்த்தங்கள் கொண்ட வரிகள்.

ஆரம்பத்தில் டார்வின் தாண்டி, கூட்டம் கூட்டமாக வாழ்ந்து, வேட்டையாடி, பலம் காட்டி, பெண்ணின் மனம் கவர்ந்து புணர்ந்து திரிந்து கொண்டிருந்த கூட்டம். மிருகங்களில் ஆண்வம்சங்களே அழகு. களிறுக்குத் தான் தந்தம். ஆண்மயிலுக்குத் தான் தோகை பிடறி சிலிர்ப்பும் ஆண் சிங்கம் என. இதனெதிர்த் தன்மை மனித வர்க்கத்திற்கு. ஆதலினால் பெண்ணைக் கவர ஆண்களின் போட்டி அன்று தொடங்கியது இன்னும் முடியவில்லை.

குழு வாழ்வு முறையில் கொஞ்சம் கொஞ்சமாய் மாற்றமேற்பட்டு, தனிக் குழுவாக, பின் தனிக் குடும்பமாக என பிரிவுகள். அப்படியான ஆரம்பம் தான் ஒருவனுக்கு(?) ஒருத்தி(?).

காதலைக் களவொழுக்கம் எனவும் அதனடுத்த நிலை கற்பொழுக்கம் என்றும் அழைக்கப்பட்ட திருமண நிகழ்வுகள் மிகுந்த லயிப்புடனும் களிப்புடனுமே நடந்தேறி இருக்கின்றன என்பதாகப் படுகிறது. ஆனால் அகப் பாடலிலோ அல்லது திருமண நிகழ்வு குறித்த பிற பாடல்களிலோ தாலி பற்றிய செய்தி இருப்பதாகத் தெரியவில்லை.

இதோ,மங்கள விழாவின் போது யாரெல்லாம் என்னவெல்லாம் செய்து கொண்டு இருந்தார்கள், எப்படி மலர்தூவி வாழ்த்தினார்கள் என்பதை இளங்கோவடிகள் காட்சிப் படுத்தியவிதம் மிகுந்த ஆச்சர்யமாய் இருக்கிறது. இன்றும் இதுவே நடைமுறையில் இருக்கிறது. தாலி தவிர.
..
விரையினர்,மலரினர்,விளங்கு மேனியர்
உரையினர்,பாட்டினர்,ஒசிந்த நோக்கினர்
சாந்தினர்,புகையினர்,தயங்கு கோதையர்,
ஏந்து இள முலையினர், இடித்த சுண்ணத்தர்,
விளக்கினர்,கலத்தினர்,விரிந்த பாலிகை
முளைக்குட நிரையினர், முகிழ்த்த மூரலர்,
போதொடு விரிகூந்தல் பொலன்றுநறுங் கொடி அன்னார்
காதலற் பிரியாமல் கவவுக்கை ஞெகிழாமல்
தீது அறுக எனஏத்திச்,சின்மலர் கொடுதூவி
அங்கன் உலகின் அருந்ததி அன்னாளை
மங்கல நல்அமளி ஏற்றினர்;

அற்புதமான திருமணக் காட்சி கோலகலமாக கண்முன் விரிகிறதா?

ராமர்-சீதை திருமண நாள் அன்று காலை முதல் நகரின் பரபரப்பை கம்பர்

முரசு அறைதலும், மான முதியவரும், இளையோரும்,
விரை செறி குழலாரும், விரவினர் விரைகின்றார்;
உரை செறி கிளையோடும், உவகையின் உயர்கின்றார்;
கரை தெரிவு அரிது ஆகும் இரவு ஒரு கரை கண்டார்.

என்று ஆரம்பித்து, அங்கே இளங்கோவடிகள் திருமண பந்தலில் சிந்திய சந்தனத்தை கம்பர் தெருமுழுக்க சிந்த விடுகிறார் இப்படி..

சந்தனம், அகில், நாறும் சாந்தொடு, தெரு எங்கும்
சிந்தினர் திரிவாரும், செழு மலர் சொரிவாரும்,
இந்திரதனு நாண, எரி மணி நிரை மாடத்து,
அந்தம் இல் விலை ஆரக் கோவைகள் அணிவாரும்

மணக்கிறதா? ராமனும் சீதையும் மன்றத்தில் அமர்ந்த நிலை பற்றி

மன்றலின் வந்து, மணத் தவிசு ஏறி,
வென்றி நெடுந் தகை வீரனும், ஆர்வத்து
இன் துணை அன்னமும், எய்தி இருந்தார்;
ஒன்றிய போகமும் யோகமும் ஒத்தார்.

இன்றும் நாம் மங்கள நிகழ்வின் போது தூவும் பூவை,

வானவர் பூ மழை, மன்னவர் பொன் பூ,
ஏனையர் தூவும் இலங்கு ஒளி முத்தம்,
தான் நகு நாள்மலர், என்று இவை தம்மால்,
மீன் நகு வானின் விளங்கியது, இப் பார்

இதன் பிறகான நம் பயணங்கள் பல் நூற்றாண்டுகள் என்றாலும் திருமணம் எனும் நிகழ்வும் மேற்சொன்ன காட்சிகளும் கிட்டத்தட்ட அப்படியே தான் நடைபெற்றுக் கொண்டே இருக்கின்றன.

அவரவர் பொருளாதார சூழலும் கெளரப் பிரச்சனையும் ஒரு புள்ளியில் இணைக்கும் திருமணங்கள் தொடர்ந்து கொண்டே இருக்கின்றன.

பெண்ணைப் பொறுத்தவரை, வேரோடு ஒரு மரத்தைப் பிடுங்கி அதை வேறோர் இடத்தில் நட்டுவிடும் நிகழ்விற்கு ஒத்த நிகழ்வான திருமணம்,பெண்களின் இருபதுகளில் தொடங்கி இந் நிகழ்வு முடியும் வரை ஒரு முக்கிய பேசு பொருளாகவே இருக்கிறது.

காதலித்து திருமணம்-திருமணத்திற்குப் பின் காதலித்தல் என்ற வார்த்தை விளையாட்டுகளுக்கெல்லாம் அப்பாற்பட்டு பார்த்தால்,

உடல்மொழி உட்பட குருதியோடு இறுதிவரை கலந்து போகும் துணையைத் தரும் நிகழ்வாகவே திருமண நிகழ்வு பார்க்கப்படுகிறது.

அலுவலகத்திலோ வெளியிலோ ஏதேனும் ஒரு சொல்லிலடங்கா பிரச்சனையை எதிர்கொண்டு, மனதில் பூட்டி வைத்து,வைராக்கியம் காத்தாலும், துணையைக் கண்டவுடன் வெடித்துத் தோள் சாயும் தோழமைதான் துணை.

சரியான துணையைத் தேர்ந்தெடுக்கும் வழிகளில் ஆகச் சிறந்த வழியான காதலைப் பற்றி..அடுத்துப் பார்ப்போம்.


..