சுஜாதா...ஆளுமையின் முழுமை.

‘கண் தானம் செய்வதற்கு பக்கத்தில் உள்ள கண்படத்தைக் க்ளிக்கி பாரத்தை பூர்த்தி செய்துவிட்டீர்கள் என்றால் இருவரின் இருள் நீங்கும். படிவத்தை பூர்த்தி செய்த பத்தாவது நிமிடம் யாரவது ஸ்கூரு ட்ரைவர் சகிதம் பஜாஜ் எம்80யிலோ டிவிஎஸ் அம்பதிலோ முகவரி தேடி வந்து ‘ரொம்ப தேங்க்ஸ் மிஸ்டர் ராஜ்குமார். உங்க ஐ டோனசன் அப்ளிகேஷன் கிடைச்சது..எடுத்துக்கவா..’ என்று கூறினால் நான் ஜவாப்தாரியல்ல’

மேற்கண்ட பத்தியை நான் எழுத வேண்டும் என்று எனக்குத் தோன்றி இருக்குமேயானல் அது சுஜாதாவை திரும்பத் திரும்ப படித்ததின் தாக்கம் அன்றி வேறு என்னவாக இருக்க முடியும். பத்தி எழுத்துகளைப் பற்றிய யாதொரு ஆய்வோ,கட்டுரையோ,பேச்சோ...அதில் சுஜாதா என்ற பெயரன்றி அமையாது. ஏனெனில் பத்தி எழுத்துகளில் சுஜாதாவின் பங்கு இன்றியமையாதது.

முதல்முறை எதேச்சையாக இவரின் எழுத்தைப் படிக்கும் எவரும் அதன்பின் அவர்பின் தான். கடைசிப் பக்கத்தின் நீட்சியாக கற்றதும் பெற்றதும். இரண்டிலுமே மிக நுட்பமான, சீரியஸான விசயங்களை போகிற போக்கில் மேலோட்டமாக சொன்னவர். ஆனால் ஆழமாக. மேலோட்டத்தில் எப்படி ஆழம் என்ற கேள்வி சுஜாதாவைப் படித்தவர்களுக்கு எழா.

சங்கப்பாடல்களையும் ஹைக்கூவையும் அருகருகே வைத்து ரசித்தவர், ரசிக்க வைத்தவர்.

‘கவிதை எழுதும் நண்பனைக் கண்டதும் சந்தில் சரேலென்று மறைந்தேன்’ அவ்வளவுதான். இந்த ஒற்றை வரியில் துள்ளும் நகைச்சுவையும் கவிஞர்கள் படுத்தும் பாடும் என அத்தனையும் கொண்டுவந்துவிடும் இதே உத்திதான் எல்லாவற்றிலும்.ஒரு எள்ளல்,ஊடாகத் தகவல்.

கணையாழியின் கடைசிப் பக்கம் தொகுப்பில் முதல் பக்கமே அதிரடியாக, தமிழ்ப் படங்களைப் பற்றியும்(60களில்) பா வரிசை செண்டிமெண்ட் குறித்தும் சிவாஜின் மிகை நடிப்பு குறித்தும், வாலியின் பாடல்கள் சரி இல்லை(காப்பி அடிப்பவரை காப்பி அடிக்கிறார்) என்றும் அதிரடியாக ஆரம்பித்திருக்கிறார்.இளமை வேகமும் எழுத்தின் வசீகரமும் சேர்ந்த அதிரடி பக்கங்களவை.

//'தமிழ்ப் படங்களுக்கு கதி இல்லை என்றேன். ஸ்ரீதரின் ‘நெஞ்சில் ஓர் ஆலயம்’ சிறந்த படங்களில் ஒன்று என்றால் தமிழ் சினிமாவுக்கு கதியில்லை என்று மறுபடி சொல்வேன்.//

இப்படியாக கவிஞர் வாலி, பஞ்சு அருணாசலம், ஸ்ரீதர், தமிழ் படங்கள் குறித்த தன் பார்வையை மாற்றியும் மாறிக்கொண்டும் வந்து, தானும் தமிழ் திரைப்பட உலகில் ஓரளவு முக்கிய பங்கையும் வகித்துப் போனவர். திரைக்கதை எழுதுவது எப்படி என்ற புத்தகம் பெரும்பான்மையான உதவி இயக்குனர்களிடம் இருக்கச் செய்தவர்.

கணேஷ் வசந்த் என்ற இரு மனிதர்கள் நிஜமாகவே இருக்கிறார்களோ என்று எண்ண வைத்தவர்.வசந்த் மூலம் தன் எள்ளல் தீர்த்தவர்.

ஸ்ரீரங்கத்து தேவதைகளின் மூலம் ஒரு ஊரை, ஒரு குழுவை, ஒரு தெருவை, ஒரு கடையை என அங்குலம் அங்குலமாக நமக்கே நமக்கானவர்களாகவும் நாம் அமர்ந்திருக்கும் இடம்போலவும் மொழிபெயர்த்தவர். அல்லது அந்த ஊரை புத்தகம் மூலம் உலகெங்கும் இடம்பெயர்த்தவர்.

ஒவ்வொரு கதையிலும் மாந்தர்கள் தோள்மேல் கைபோட்டு அருகில் இருப்பது போலவே ஒரு உணர்வை எப்படிக் கொண்டு வந்தார் என்று இன்று வரை அறிய முயன்று தோற்றுக் கொண்டே இருக்க வைக்குமோர் அற்புதக் கலைக் கை விரல்கள் சுஜாதாவினுடையது.

ஒரு கதையில் ஆறு ஏழு வரிகளுக்கும் மேலாக ஒரு வீட்டையும் அதற்குள் இருக்கும் அறையையும் விஸ்தாரமாக விவரித்து கடைசி வார்த்தையில் ‘சீனு தொங்கிக்கொண்டிருந்தான்’ எனும் போது அதிர்வின் வினை அதிகமாகக் கூடும் எனும் உத்தி அவரின் நேர்த்தி.

தன் வாசகன் தன்னைத் தாண்டிச் செல்ல வேண்டும் என்பதில் இறுதிவரை உறுதியாய் இருந்தவர்.அறுபதுகளில் கடைசிப்பக்கங்களில் நல்ல எழுத்துகளையும்,கவிதைகளையும் மேலை,கீழை என தேடித் தேடி அறிமுகப்படுத்தியவர்.எரிக்கா ஜாங்கில் துவங்கி தன்னுடைய தெருவில் இருப்பவரின் கவிதைத் தொகுப்பு வரை அனைத்தையும் படித்து,தனக்குப் பிடித்ததை பதிவதில் பிடிவாதமாய் இருந்தவர்.

ராயப்பேட்டை பாலு வா அவிழ்ப்போம் முடிச்சை’ என்பதில் உள்ள குத்து, உள்குத்து. அப்பொழுதே ஆரம்பித்து வைத்தவர் சுஜாதா. எங்கோ நடந்த விவகாரம். புரிந்தால் இனிக்கும் காரம்.

சுஜாதாவைத் தவிர வேறொன்றுமில்லை என்றிருந்த காலகட்டங்களைத் தாண்டி வந்து பதிவுலக வாயிலாக மாற்று எழுத்துகளும் மிகச் சிறந்த ஆளுமைகளும் இங்கே பரவிக் கிடப்பதை அறிந்து கொண்ட நேரம் அவர் உயிரோடில்லை. ஆம். சுஜாதாவையும் தாண்டிய எழுத்துகள் தமிழ் நல்லுலகம் உரக்கக் கூவிக் கூறிக்கொண்டு தான் இருந்திருக்கிற்து. என்றாலும் சுஜாதா என்ற பெயரின் ஆளுமை முன்வரிசையில் நின்று கொண்டதாகவே தோன்றுகிறது.


சிறுகதைகளில் அவர் வகுத்த ஆரம்பம் நடு முடிவு போன்றவைகளில் உடன்பாடில்லை என்றாலும்,அவரின் சிறுகதைகளில் ஒன்றில் கூட ஒன்றாமல் இருந்ததில்லை.சொல்லும் விதமும்,கதை செல்லும் வேகமும்,வார்த்தைகளின் வசீகரமும் என அவரின் கதைகள் எல்லாமே முடிந்தும் முடியாமல் மனதில் இருப்பவை, அவரைப் போலவே.

அவரின் தொடரும் நினைவுகளைப் போல இக் கட்டுரையும் முற்றுப் பெறாமலே...


**********