னகர முதல.

எரிந்துகொண்டிருக்கிறது

எலும்புகள் எழும் எனக் குழைத்து அப்பிய
சாந்து இறுகி விரிகிறது.

உடன் வந்தவர்கள்
தீவுகளாய் நின்று
பழங்கதைகள் தின்று கொண்டிருந்தார்கள்
எல்லாக்கதைகளிலும் எரிபவன் நாயகன்.

முட்செடிகளை ஒடித்துண்டாக்கிய
தற்காலிகப் பாதையில்
திரும்பிக் கொண்டிருந்தன தீவுகள்.

நெஞ்சில் எரியும் சிதையில்
தன் குச்சியைக் கொண்டு கிளறி
நெருப்பின் உக்கிரம் கூட்டியவனின்
அலைபேசி அலறியது.

தன் கல்யாணத் தேதியை
உறுதிபடுத்தி அலையணைத்தவனின்
குச்சி இப்பொழுது தீயைப் பெருந்தீயாக்கியது
குச்சியில் தீயின் தடமேதுமில்லை-
லாகவம்.

எரிந்தடங்கட்டும் என
தள்ளி அமர்ந்து கொண்டு
வெற்றிலையைத் தொடையில்
தேய்க்கத் தொடங்கினான்

மூச்சிறைக்க ஓடிவந்தவன்
இவன் கைக்குச்சியை எடுத்தோடினான்.
முனகி ஈனும் மாட்டின்
பிறப்புறுப்பைத் தளர்த்தி
வழி திறக்க.