என்’ணங்கள் 11/11/2010

நெடுஞ்சாலை…

‘எனுமா எழுதி இருக்காரு கண்மணி குணசேகர அண்ண’ !

என்று என் மொழியும் அந்த வட்டாரத்திலேயே வட்டமடித்துக் கொண்டிருக்கிறது.

நெடுஞ்சாலை எனும் கண்மணி குணசேகரனின் நாவல் ஏற்படுத்தி இருக்கும் பாதிப்பு நீங்க இன்னும் நெடுநாட்கள் ஆகும்.

வட்டார மொழி நாவல்களில், இந்த அளவிற்கு நுட்பமாக மொழியை வடித்திட முடியுமா எனும் வியப்பு இன்னும் அகலவில்லை.

சிறுவயதில் பாஸ் எடுக்க மாதாமாதம் மதுரை எல்லிஸ் நகர் டிப்போவுக்கு போகும் பொழுது, பெரிய டயர்களை உருட்டிக்கொண்டும், காலி பஸ்களை ரிவர்ஸ் எடுத்துக்கொண்டும் இருப்பார்கள் போக்குவரத்துத் துறை ஊழியர்கள். அவர்களுக்குப் பின்னால் இப்படி ஒரு முடிச்சு இருக்கும் என நினைத்துக் கூடப் பார்த்ததில்லை.

ஒவ்வொரு கதாபாத்திரங்களும் உயிர்பெற்று நகமும் சதையுமாக நம்மோடு நடமாடுவது போல ஒரு பிரமையை ஏற்படுத்தியதே இவ்வளவு பெரிய நாவலின் ஆகப்பெரிய வெற்றி.

தமிழரசன், அய்யனார், ஏழைமுத்து என்ற மூன்று தற்காலிக தொழிலார்களின் மூலம் பேருந்தின் இண்டு இடுக்கெல்லாம் நம்மை கூட்டிச் சென்றிருக்கிறார் ஆசிரியர்.

காதல்,காமம்,பாசம், நட்பு, என எல்லா உணர்வுகளும் குழைத்த, மண்ணைப் பிசைந்து கதை செய்யப்பட்ட நாவல்.

தமிழரசன் முதன்முதலில் ஒரு பெண்ணைப் பேருந்தில், வெகு அருகே பார்த்ததும் நிகழும் மாற்றங்களும் அதன்பின்னர் கணக்கை முடிக்க முடியாமல் படும் பாட்டையும்.. என நாவல் குறித்து நிறைய எழுதிக்கொண்டே போகலாம்.

தமிழினி வெளியீடு.
விலை : 230.

**

சென்னை-மதுரை தேசிய நெடுஞ்சாலை அற்புதமாய் இருக்கிறது. மழையும் மஞ்சள் வெயிலும் இரவின் மஞ்சள் வெளிச்சமும் என ஏகாந்தம். பகலிரவு கிரிக்கெட் மைதானம் போல டோல்கேட்டுகள். வசூலித்தாலும் நன்றாக பராமரிக்கிறார்கள்.

தீபாவளியை துரத்திக்கொண்டே ஊருக்குப் போனது இதமென்றால், நம்மைத் துரத்தி, சைடு வாங்கி, டீக்கடையில் நின்று ஸ்னேகமாய் சிரித்த சகவாகனர்களும் மழை-இஞ்சி டீயும் இன்னும் இதம்.

தீபாவளிக்கு முந்தைய இரவு டவுன்ஹால் ரோடு, கீழவாசல் எல்லாம் அப்படியே இருக்கிறது. ஜனத்திரள், ஜவுளிக்கடல் என மதுரை, மதுரைதான்.

**

டிக்கு, ஸ்கூட்டு, மஸ்ட்டு, ஃபுல்லுக்குத் தாங்காது… இந்த வார்த்தைகளோடு மட்டுமே தீபாவளி கழிந்தது. டிவி நிகழ்ச்சிகளில் கழிந்திருக்க வேண்டிய தீபாவளி நல்ல வேளையாக ரம்மியில் போனது. ரம்மியாட்டத்தின் ரம்மியம் இன்னும் குறையவில்லை. முன்பெல்லாம் அடிதடியாகும். இப்பொழுது வார்த்தைகளோடு முடித்துக் கொண்டோம். தோப்பு ஆயிரம் ஓவா.

**

கோவை என்கவுண்ட்டர் பற்றி நிறைய எழுதிவிட்டார்கள், சரியா தவறா, தவறுக்கு இதுதான் சரியா என.. இது மக்களின் மனநிலையை பார்த்து அரசு எடுத்த முடிவாகப்படுகிறது. சில மாதங்களுக்கு முன்னர் ஆந்திராவில் மூன்று மாணவர்கள் ஒரு மாணவி மீது ஆசிட் ஊற்றிய வழக்கில், மக்களின் கொந்தளிப்பைக் கணக்கில் கொண்டு, இதே போல் அதிகாலை ஆசிட் ஊற்றிய இடத்தைக் காட்டச் சொல்லி கூட்டுப் போய் சுட்டார்கள்.

நன்றி.

**

மழையில், மதுரை போய்வந்ததாலோ என்னவோ..


கற்கண்டின் மீது பெய்த மழை.


இந்திய வரைபடத்திற்கொப்பாய்
இரு கைகளையும் விரித்து
என்னை நோக்கி நிற்கின்றாய்

உன்னை முழுக்க நனைத்த மழை
இப்பொழுது முற்றாக நின்று,
மஞ்சள் வெயில் காய்ந்து கொண்டிருக்கிறது


நெற்றியில் சுருண்டிருக்கும்
ஒற்றை முடியின் முனையில்
எக்கணமும் உருளப்போகும் திவலை
இமை முடிகளின் ஈரம்
காதுநுனிகளில் இருந்து
வழிந்து கொண்டிருக்கும் மழைநீர்
புத்தர் சாயலில் சிரிக்கிறாய்

மிகச்சரியாய் நான்கு அடிகளில்
உன்னை அடைந்திடலாம்தான்
ஆனபொழுதும்
அருகில் வரப்போவதில்லை இப்போது
எப்பொழுதுதாவது இப்படி
கண்ணிற்கும் ஈயப்படுகிறது
சுகித்துக் களிக்கிறேன்
சகித்துக்கொள்
சகி.

**